الأربعاء، 17 يناير 2007


اشتغلت في حضانه عادي على اساس انى بحب الاطفال وكنت فاكره ان شغل الحضانات ده سهل وجميل وانى هاقعد العب مع الاطفال واكلهم وخلاص ...اطفال بقى والاطفال احباب الله وبصراحه مع اول يوم اتفاجأت باطفال اليوم يعنى مثلا:

طفل اربع سنين كان بيتكلم فبعاكسه بقوله :انت بتكلم صاحبك في ايه؟

يرد عليا: معلش اصلي بكلمه في موضوع خاص بينى وبينه.

قلتله :يعنى ماينفعش اعرف.

قالى:لا معلش اصله سر.


واحد تانى لاقيته بيقولى: مس ممكن اقول لروان انتى وحشتيني؟


بنوته تانيه طعمه اوى قعدها على حجري وقعدت اتكلم معاها فبسألها: هاه هاتلبسي ايه في الرجله بكره؟

قالتلى :هدوم العيد طبعا يعنى هالبس ايه؟

قلتلها : شكلها ايه هدوم العيد؟

قالتلى: يعنى انا لو قلتلك هاتعرفيها؟

طبعا البنت عندها حق...المهم اتخرست.


ولد تانى ببعتله بوسه في الهوا لقيته بيغمز لى وقام يبوسنى...بعدها الفصل كان مشاغب جدا فقعدت ازعق جامد فيهم لقيته راح قايم ومزعق لهم وقال"كده تزعلوا المس...طيب يلا يا مس لما اروحك"

طبعا زهلت من رد فعله.


ولد تانى قمة الدلع باباه جاى ياخده من الحضانه الولد معجبتوش العربيه اللى باباه جاى ياخده بيها رجع باباه عشان يجيب العربيه بتاعه ماما .........ِشفتوا الدلع وصل لفين.....وطبعا باباه راح وسابه مع 5 مدرسات لحد الساعه2.30عشان يجيب لسيادته العربيه التانيه.


ولد تانى كان عيان عارفين ليه؟ اصله وقف في البلكون فاتح صدره قال بيعمل زي احمد السقا في افريكانو


طبعا ده اول اسبوع بس من شغلي في الحضانه ربنا يستر عليا بقى مايحصليش ارتجاج في المخ من اللى بشوفه واللى بسمعه

على فكره احنا مكناش عيااااااااااااااااااااااااااااااااااااااال

اشتغلت في حضانه عادي على اساس انى بحب الاطفال وكنت فاركه ان شغل الحضانات ده سهل وجميل وانى هاقعد العب مع الاطفال

الاثنين، 15 يناير 2007

نعمل كده......ولا كده؟؟؟؟؟؟؟؟؟

اللى دفعنى انى اكتب المدونه دي انى حابه انى انشر ارائى وانى اعرف راى الاخرين فيها...ولذلك انا حبيتاسأل سؤال كتير اوى جه على بالي هوه الانسان بيختار شريك حياته على اى اساس؟ هل يا ترى على اساس الماديات ولا على اساس الحب والصدق ولا ايه بالظبط؟
يعنى فيه بنات كتيييييييير اوى اعرفهم اتجوزوا عن طريق التوكيل يبقى العريس الباشا مشافر ويبعت لماما يقولها انا عايز اتجوز تقوم ماما تفرح اوى به وتعمل ايه تدور على عروسه لابنها الكتكتوت اللى مابيعرفش يختار وتختارها فعلا وتوريله صورتها عن طريق الانترنت بقى او عن طريق الجوابات وتعجبه والعريس الجميل يعمل لبابا توكيل عشان يتجوزهاله في مصر ويبقى هوه مشارك بس عن طريق الكاميرا في الانترنت واهل العروسه يوافقوا...هوه حد لاقي عرسان دلوقتى؟...ولا حد لاقي حد بالمواصفات دي معاه فلوس ومتريش ؟... والغالبانه العروسه تفرح بالشبكه الغاليه وتسافر على عماها بقى للعريس المنتظر واتفرجوا بقى طبعا مش محتاجه انى اقول ان اغلبهم ان مكانش كلهم بيطلقوا وتفضل هيه بقىحامله لقب مطلقه طووووووول العمر ومين بقى هايقبل بواحده مطلقه
صوره تانيه حبيت اقف عندها وهيه جواز الصالونات (واللى رجع تانى دلوقتى) واقف قادمها كتير وافكر هل هيه فعلا صح ولا غلط..واسال نفسي كمان طب يعنى هيه البنات هاتمشي على حل شعرها يعنى وتعرف ده وده...بس جواز الصالونات دهممكن يمشي لو فيه حاجه واحده اتحققت ان الشباب دلوقتى بيعجبوا بواحده وييجي يسأل عليها يلاقيها كانت مخطوبه مره يجري زيسيبها كأنها جربانه او فيها حاجه لا سمح اللله هيه الخطوبه دي عيب وتلاقي نفس الشاب يعجب بواحده ومكانتش مخطوبه ولا حاجه بس تكون هيه ماشيه مره واتنين وتلاته وعشره لكن مش معروف للناس ويبقى سعيد بيها لانها طبعا مش هاتقوله هاتقوله انت اول واحد في حياتى وانت اول حب الى اخره من الكلام المعروف لينا كلنا ده ويبقى سعيد بيها
يرجع مرجوعنا تانى للبنت اللى كانت مخطوبه هل هيه ذنبها انها عملت كل شىء في النور واتخطبت ادام الناس ولكا محصلش نصيب زي ما بيقولوا ولا كانت المفروض تعمل زي ما بقيه البنات تعمل تخرج مع ده وتقابل ده وتعشم ده .....ولكن السبب في الاول وفي الاخر هوه الشباب اللى دماغهم كده بيحبوا اللى يخدعهم ويضحك عليهم
طب والحل هل جواز الصالونات افضل ولا الواحده تحب وتشوف حالها في الضلمه لحد ما ربنا يسهل وتعرف توقع اللى معاها وتخليه ييجي على بوزه ويخطبها وتبقى شريفه ومعملتش حاجه؟؟؟؟
مش عارفه الاجابه ولقيت نفسي جدا حد يرد عليا بجواب يقنعنى لان ليا اصدقتء كتير بيندموا انهم اتخطبوا وليا معارف تانيه من النوع التانى اللى بالى بالك وشايفاهم متهنيين جدا

هل حقا ...انتهى المشوار؟

استوحيت اسم المدون ده من اغنية المبدع كاظم الساهر...ولكن فكرت كتير هل فعلا انتهى المشوار بالنسبه لاى شاب اتخرج من الجامعه؟...لانه بالطبع عايز يشتغل ولما يحب انه يشتغل يلاقي عقبات كتير قدامه زي انهم بيعوزاوا خبره في الشغل مش عارفه كام سنه...لا دول عايزين مش عارفه كورسات في ايه وفي ايه وحتى لو اخد الكورسات دي ويروح يعملوله اختبارات ويسقطوه عشان الواسطه (ماهو اللى له ضهر ماينضربش على بطنه).
وياعيني عليه بقى لو كان بيحب ...ياسيدي... تبقى فعلا كملت من مجاميعه عايز يرتبط باللى يحبها من حقه طبعا لانه مش من الساهل انه حد يلاقي الحب الحقيقي في الزمن ده ويضطر بقى انه يضغط على اهله عشان يساعدوه وتيدأ بقى المشاكل ووجع القلب
يعنى مثلا يتخلى عن الحب الحقيقي اللى لقاه ومش هايلاقيه تانى...(وادي اول مسماريندق في نعشه) ... ويبدا بقى الاحباط انه يلاقي شغل او يلاقي حبيبه تهون عليه مشاكله
ويبدأ يفكر في اول حاجه انه يسيب بلده ويشتغل في بلد تانيه ويدي كل ولائه ومجهوده وتعبه لبلد تانيه والنتيجه ان البلاد التانيه تتقدم وتبقى احسن مننا في كل حاجه والنتيجه الحتميه لده كله اننا نكره البلد والظروف اللى احنا عايشين فيها
ولكن بقى يبقى سؤال واحد هل فعلا انتهى المشوار بالنسبه لاى حد فينا بيحلم بالوظيفه وانه يطلع كل طاقاته لبلده؟ ولا دي مجرد نظره تشاؤميه منى؟